ESPERANTO

Esperanto estas lingvo kreita por faciligi la komunikadon inter la popoloj de la tuta mondo. Pli ol cent jaroj da praktika utiligo faris Esperanton vivanta lingvo, kapabla esprimi ian ajn nuancon de la homa penso. Ĝi estas internacia kaj neŭtrala, ĉar ĝi apartenas al ĉiuj popoloj kaj ebligas la komunikadon inter homoj de la tuta mondo, sen ia ajn tendenco de kultura, politika, religia aŭ ekonomia hegemonio. Kiu lernas Esperanton havas la privilegion ĝui du civitanecojn, kiuj reciproke interagas kaj sin riĉigas: la unuan ĉiuj ricevas aŭtomate ĉe la naskiĝo. Ĝi estas influata de la landaj tradicioj, moroj kaj kredoj, tio estas, de la loka kulturo. La duan oni ekhavas, kiam oni propravole elektas esti mondcivitanoj, per Esperanto. Pli ampleksa ol la unua, tiu ĉi enhavas la mondan kulturon, en ĝiaj plej diversaj manifestiĝoj. Tiuj, kiuj elektas la "duoblan civitanecon" per Esperanto estas nomataj esperantistoj. Ili estas homoj, kiuj ne nur scipovas la lingvon, sed ankaŭ ĝin uzas por komunikiĝi kun esperantistoj el aliaj landoj, por estigi kontaktojn kun diversaj kulturoj kaj estas aktivuloj por la disvastigo kaj defendo de la ideo de Internacia Lingvo. Post la apero de Esperanto la personoj ĝin lernintaj eksentis la bezonon organizi grupojn por ĝia praktikado, instruado kaj disvastigado. Kun la tempopaso tiuj grupoj kreskis, kelkaj transpasis la limojn de siaj devenaj landoj, novaj ekaperis kaj nuntempe ni havas centojn da aktivaj esperantaj organizoj tra la tuta mondo. Kune kun la esperantistoj tiuj grupoj formas la Mondon de Esperanto, kaj la agadon tie faratan oni konvencie nomas esperanta movado. Lernu Esperanton, fariĝu esperantisto kaj ekĝuu la esperantan mondon! Ĝi estas dekomence ankaŭ via! Esperanto en Interreto:

Kurso de Esperanto: http://www.cursodeesperanto.com.br

Universala Esperanto-Asocio: http://www.uea.org

ARTIKOLOJ:

1. Esperantigu la tutan mondon! Maciej Zgondek

2. Ludoviko Lazaro Zamenhofo. Maciej Zgondek

3. Je kio kredis Ludoviko Lazaro Zamenhof? Michael Müller